Scritta da: Bepi Zuccollo
in Poesie (Poesie vernacolari)
La lòlica del tenpo
El celo ze na coerta de viole stasera.
Onbrìe longhe, onbrìe córte
sbrega l'aria.
Bala so 'l salìso
el valser de l'eterna fadiga.
'N giro, du giri…
Na giraolta,
e altri du giri
'n te la lòlica del tenpo.
On vecio sopéta
passi incatijà de autuno
rento passi ciari de primavera.
Na rìndola de pesso
schersa co l'aqua.
Sbètega l'aqua
stornèi de canson e canson.
Foie seche nudo lassa el ramo,
foie verde lo riveste de novo.
E la lòlica del tenpo
sbrissia via, cossì la saonèla
da le man de la lavandàra,
so na carossa bardà de sole …e de nibie.
Se desfa dresse corióse
drio siése ricamà
de zughi e coluri.
Solo desso
che la curva de la schena
e la coerta de viole
me sgrìsola na caressa,
me acorzo de quanto ze alta la curva
so la schena del vecio.
Bassa la curva del celo
che dolze se piega
a disegnare 'n abrasso
'n te la lòlica del tenpo.
Commenta