'A morte 'e Napule

Na sera, ncopp' 'o Vommero,
ncuntraie nu furastiero,
nu viecchio amico 'e scola:
abbracci, frasi tenere,
ricordi, pizzaiuole.
E nel gustar la pizza,
cantava 'o sunatore:
"Napule,
terra 'e ll'ammore,
surriso 'e manduline,
mandulinata 'e sole,
primma cantave,
e mmo'?
Mo' te staie zitta,
e chiagne...
e tt'arrecuorde
'e tiempe d' 'e vvìòle,
quanno scenneva
'a copp' 'o monte,
a Mmarzo,
chell'aria fresca,
chillu prufumo 'e sole...
Embè, che vvuo':
tutto fennesce,
tutto passa e mmore..."

Senteva, 'o furastiero,
e ss'astregneva 'o core;
e ricordava il traffico,
chell'ammuina 'e suone,
'o fummo,
i sacchi a perdere,
ll'inquinamento,
'e stuone...
Gridò: "Vero è, Giuseppe,
Napoli va a morir:
come Venezia esala
già l'ultimo sospir."
Così iniziò il discorso
che mm'ammurbaie cchiù 'e n'ora;
po' se facette tarde:
"E' ora di partir:
stasera sono a L'Aquila,
domani a Mondovì":
abbracci, convenevoli,
partette, restai lì.
Rimasi pensieroso,
lo sguardo nel bicchiere...
Quand'ecco, 'o musicante
s'accosta, ride, e ssona.
"Napule,
terra 'e ll'ammore,
surriso 'e manduline,
mandulinata 'e sole,
primma cantave...
e mmo'?
Mo' te staie zitta,
e chiagne...
e tt'arrecuorde
'e tiempe d' 'e vvìòle,
quanno scenneva
'a copp' 'o monte,
a Mmarzo,
chell'aria fresca,
chillu prufumo 'e sole...
Embè, che vvuo',
tutto fennesce,
tutto passa e mmore...

Murisse pure tu,
si nun ce stesse 'o popolo,
'e strille d' 'e ccriature,
triccabballacche, tronnole,
vaiasse, scavezune,
pe te scetà, pe ddicere:
- Ohi né, che vvuo' murì?
Se po' murì cu 'e diebbete,
'e 'nzerte'e pummarole,
pullecenella, appicceche,
munnezza, trezziole...
tu può murì
sulo facenno 'a mossa,
po' sfizio 'e vedé 'e llacreme,
'a faccia d' 'o cucchiere,
'e rrise, 'e ffacce 'e pacchere,
'a scena d' 'e cchiazzere... -
Sentite a mme,
sentite a mme, ch'è 'o vero:
chella d' 'a morte 'e Napule
è rrobba 'e furastiere!"

Giuseppe Freda

• Biografia
• Leggi tutte le opere