La volpe

La fioca de fora e nèvega a derli,
bianche le siese ai confini del canpo,
i cachi deventa spumìlie pai merli,
core i tusiti par fare el so stanpo.

Le sama  dal cielo ste ave de argento,
ghi n’è che se ferma, na rama le orna,
come i ricordi che uno ga rento,
ghi n’è che se desfa, ghi n’è che ritorna:

pèche de volpe fin rente al punaro,
me nono che speta,  note de luna;
la s-ciopa la varda zo verso el Valdaro,
onbre se move el vento le cuna.

La sponta, sta fermo, la pare decisa,
l’è proprio on volpon, l’è grande fa on can,
ponta me nono co ‘a mira precisa,
el colpo che parte se smorsa lontan.

Se sveja la note, la pare na guera,
coremo a la volpe distesa par tera.
Me nono el la varda el bestiema pinpian:
Ah, toso, cramento, a go copà el can!