Cu veni di luntanu e ti talia, ci appari comu un grossu lumacuni li tò biddizzi sunnu la malia c’ attiranu migghiara di pirsuni! Di suttu a vecchia rocca Saracina tu scinni fino a’ scoghi a la marina;
Si tuttu circunnatu di jardini ch’ aduranu di zagara e di rosi, garofoli, violi e gelsumini, di glicini di gigghi e di minose; e quannu spacca l’alba e u suli assuma l’ aria ‘ntornu a tia si prufuma!
ti fannu di curuna li cullini, chini di castagni, ulivi e viti; d’ arrieri di muntagni li catini cu voschi di cersi, suguri e abiti; lu mari blu si stenni a’ i tò piragni unni tanta genti si fà i bagni!
Li to natali d’ epuchi luntani si perdunu antrà u tempu e c’è cu dici ca tu nascisti ai tempi di rumani o addirittura ai tempi di finici! Lu granni Ciciruni dissi a genti “Tu si paisi beddu assà piacenti!”
Tu nun piaci sulu a li forasteri ma sì ‘ntrà cori di tutti i paisani chi sunnu fora ‘ntra sti peri peri, p’ abbuscarisi tanticchiedda i pani! e di luntanu cun granni nustalgia la rocca tò l’ attira e l’ ammalia!
Commenti