Cu 'e penziere mieje

Cu 'e penziere mieje
senza arrepuoso
miezzo all'ate i' cammino.
Pe' nu me fa scuprì
cupo e appucundruto
ogne mumento me travesto
e fingo nu surriso.
Nisciuno sape
ca si dinto so' amariggiato
e 'a fore pare ca rire
nun è pecché 'o tiempo passa
e 'a morte s'avvicina
ma è pecché l'ammore aggiù perduto
e suppurtà chesto, n'omme, nun 'o po'!
Ah quanta senghe s'arapeno ogni juorno
e pe' l'anema po' trase nu male scuro!
Vulisse caccià l'ogne
e te difendere 'a nu nemico
ca nun cunusce, 'a nu nemico
ca nun te guarde dint'a faccia!
E si 'e tutto chesto
a quaccheruno parlasso?
Ma chi me desse aurienzo!
Chi po' sentì
'o rummore forte e cupo
e na vita sulagna ca scarrupa!
Ah putè ncuntrà na femmena
e ce dicere: - Facite assaggià
n'ata goccia d'ammore,
truvà nu poco 'e luce
dint'a l'uocchie vuoste
a chi cchiù niente s'aspetta;
a st'ommo ca cchiù niente le resta
regalatelo si putite
na vrenzula 'e speranza!
E sì, pe' te rassignà
a na vita senz'ammore
nun aviss'a tenè core
e i' 'o tengo .. 'o tengo 'o core!