Che m'è succiesso da quanno mettennemo na mazz' 'e scopa sott' 'e cosce, comme si fosse stato nu cavallo, cu na scimitarra fatt' 'e cartone rinfurzato curreva a fa guerra cu 'e nemico ca steva p'arrivà; ... da quanno m'abbuscaje na preta ncapo, doppo na secutiata? Che m'è succiesso da quanno appuntunato all'angulo 'e nu vico apettava tremmanno ca passasse na guaglione e 'o core dicesse: - Mò ca passa lle facci' 'o surdeglino, m'accosta e lle dico : Vuje, mme facito suspirà! -? Che m'è succiesso 'a quanno na femmena me mannaje addì ca mme vuleva e i', gamme chïate, appuiato restai nfacci'a nu muro c' 'o core ca sbatteva e tremmava p' 'a nuvità? Che m'è succiesso 'a quanno addiventato n'ommo, sturduto d' 'a speranza ca runzea, mpapucchiato da mille sbarìe 'o tic-tac 'e nu rilorgio accuminciaje a cuntà juorne, anne e malincunie? Che m'è succiesso? M'è succiesso ca me so' fatto viecchio! St'uocchie senza chianto e stu core tutto curaggio hanno capito 'a verità! Mo 'o saccio! E chi se ne mporta si me restano 'a sfuglià sulo poco paggene primm' 'e nserrà 'o libbro d' 'o destino, c' 'a vita, passanno comm'o viento arapette tànto tiempo fà!
Commenti