Da quanno 'o core na fèmmena me cunsuma e nun me dà pace chello ca d''a matina a' sera vulesso e me passa pa' capa è ca 'e sùbbeto 'a morte venesso a me piglià. Si, oje morte, fa ambressa viene nun me fa aspettà assaje stanco so 'e campà: nzerra st'uocchje e pigliàte sta vita ca nun saccio che ne fà! N'ammore ca m'accumpagnasso pa' vecchiaia a essa cercajo; 'a mmescafrancesca, senza cuscienza, d'int'a nu suonne sunnato fauza cu prumesse m'arravugliaje: 'a cartera sapeva buono 'o juoco cu l'asse d'o spuglià futteva a tutte chillo ca 'ncuntrava l'arte d' 'o mbruglià fino cunuscevo! -E' a sta sempe cu mme!- cuffianno nu juorno me decetto senza nu muzzeco 'e bene e i' povero scemo lle credetto truvanno nu mutivo pe' campà; 'a bona pella p''o lietto fatto 'e fatte suoje dànno 'a nnummenata 'a 'e figlje -ca sanno sulo scamazzà chi lle fa bene- mmentaje 'na buscìa e cu 'na vutat''e mente 'a vita mia d'int'a niente arrevutaje: senza ragione e senza scuorno annuro e svestute 'e speranze miezz' 'a via me sbatteva comme si i' nisciuno fosse stato. Si uno arrobba va carcerato ma chi t'arrobba 'o core cu na prumessa ca nun mantene o pe' p'ingiaria arrecoglia sulo pe' nu sfizio suoie che pena pò addà scuntà? Comme se po' cuntà chello c'aggio patuto 'a purcaria a tradimento fatta 'a uno comme a mme 'o dulore ca 'a famiglia mia aggio dato e pure m'a purdunato. Mprusato nun voglio campà, accussì: nun pozzo cchiù campà! Morte viene mò nun me fa cchiù aspettà nun me fa fesso pure tu dicennemo: -Trica n'atu poco ca ancora a tiene 'na speranza 'nu mutivo pe' campà ca dimano n'ata luce ce po' stà!- Famme cuntento, damme pace: a sti mariuole 'e bene e dignità nun me fa cchiu' pensà all'ombra d' 'a croce, morte pe' sempe, famme arrepusà!
Commenti