Mmiezz'a via cammenanno quanta vote, senza vulerlo, l'uocchie ncopp'a chilli manifeste burdate'a lutto sò cadute; dèceduto e sbiadito nun nomme scunusciuto appena se leggeva. Cu'o core, senza dicere niente a nusciuno, spisso po' aggio pensato: - Comm'a n'amico fedele, d''a matina â sera, annascosta aspettanno d'int'a l'ombra, pronta pè ce abbraccià, senza parlà, da che munno è munno, 'a morte ce accunpagna! Sempe a l'erta, maje stanca, comm'a na sentinella essa ce spia e vede chello ca facimmo! Na distrazione, na malatia so tutto occasione bone pè ce correre ncuntro e ce carrià... a l'ato munno! Quanno all'appuntamento puntuale s'appresenta e ce piglia sott'o vraccio, avvellutata comm'a na sposa, vestute'e niro, festa le facimmo: sciure, musica, curteo, cerròggene, lacreme e marmo d'ata qualità per essa sò sempe pronte. Nu juorno addò uno, nu juorno addò n'ato sempe trova che ffà, e maje'a spasso stà! Àneme senza sciato, trasporta in quantità! Â mità autunno, quann'a malincunia, piglia pure à lu tiempo, pè st'impegno custanto ca essa teno pè tutto l'anno, ggente'e tutto specie, buone e malamente, addulurata ma dèvota â casa soje và a visità! 'A casa soje? E chi nun'a cunosce! 'A casa soje è addò stanno chillo ca cchiù nun ce stanno, là, addò'a poco, mpruvvisamento nu juorno scarugnato pure papà mio se ne juto! Parlà d'a morte pè chi è vivo, arricurdarse'e tutto chillo c'avimmo perduto, na bella cosa nun è, e, si a Essa ce penzammo buono 'a pella s'arriccia e dint'a nu mumento a vita se fa scura! Siente all'ora, ch'hai abbisogno'e luce e accussì a lu surriso e à carezza d''a speranza 'o core corre e se cunsegna pè putè cu ànemo e curaggio affruntà chello ca primmo o doppo puro l'aspetta! Ah'a ggente, 'a ggente ca smania e se ammuïna, ca fa finta e nun sapè ca nterra o d'int'a nu cufunaturo, cunsignato a nu scunusciuto, comme si non fossemo maje stato abbandunato d''a vita lasciate po' venimmo! Doppe tantu tiempo chi maje cercarrà nutizie'e nuje, che remarrà maje d''a superbia e d''a mmiria nosta quanno passata'a chianozza d'ô tiempo, metuto d''a fauce affilata d'a morte, polvere tutt'aguale 'a limma'e l'Eterno ce arriduce!
Commenti