Seguimi!Profilo utente

Poesie inserite da Marilù Rossi

Questo utente ha inserito contributi anche in Frasi & Aforismi e in Umorismo.
1 di 10
Scritta da: Marilù Rossi
in Poesie ()

Campanilismo

Nu Milanese fa na cosa? embè,
tutta Milano: - Evviva 'o Milanese!
È rrobba lloro e l'hann' 'a sustenè,
e 'o stesso 'o Turinese e 'o Genovese.

Roma? : - Chisto è Rumano e si è Rumano,
naturalmente vene primma 'e te.
Roma è la Capitale! E si è Tuscano,
Firenze ne fa subbito nu rre.

Si fa na cosa bona nu Pugliese?
Bari, cu tutte 'e Puglie, 'o ffa sapè.
Si è d' 'a Basilicata o Calavrese,
na gara a chi cchiù meglio 'o po' tenè.

È nu Palermitano o Catanese?
tutt''a Sicilia: - Chisto è figlio a mme!
Si è n'Umbro, Sardo, Veneto, Abruzzese,
'a terra soia s''o vanta comme a cche.

Le fanno 'e ffeste, aizano 'o pavese:
senza suttilizzà si è o nun è.
Nun c'è nu Parmigiano o Bolognese
ca 'e suoie nun s' 'o difendono; e pecché

si è nu Napulitano, 'a città soia,
'o ricunosce e nun ce 'o ddà a parè?
S''o vasa 'nsuonno e nun le dà sta gioia.
E 'e trombe 'e llate squillano: " Tetèee! "

Qualunque cosa fa, siente: - " E ched'è? "
" 'O ssaccio fà pur'io. " " Senza pretese. "
E chesto simme nuie. Dopo di che,
Nun se fa niente 'e buono a stu paese?

E tu, Napule mia, permiette chesto?
Strignece 'mpietto a te, figlie e figliaste.
Arapencelle 'e braccia e fallo priesto:
avimm' 'a stà a " guaglione " e simmo maste.

T'avante 'e vermicielle, 'e pummarole:
mmescace pure a nuie si 'o mmeretammo.
Che vvuò ca, cu stu cielo e chistu sole,
te dammo nu saluto e ce ne jammo?

Campanilismo bello, addò sì ghiuto?
facimmolo nuie pure comme a ll'ate.
si no p' 'a gente 'e Napule è fernuto,
e nun sarrammo maie cunsiderate.

Talento ne tenimmo, avimmo ingegno:
nu poco sulo ca ce sustenimmo,
cunquistarrammo chillu posto degno
ca, pè mullezza nosta, nun tenimmo.

Quanno na cosa è bbona e è nata ccà,
nu milione 'e gente l'ha da dì.
E vedarraie po' Napule addò va,
cu tutto ca è 'o paese d' 'o ddurmì.
Crea la tua Immagine
Vota la poesia: Commenta
    Scritta da: Marilù Rossi
    in Poesie ()

    Il Testamento

    Si overo more 'o cuorpo sulamente
    e ll'anema rinasce 'ncuorpo a n'ato,
    ì mo sò n'ommo, e primma che sò stato?
    'na pecora, 'nu ciuccio, 'nu serpente?
    E doppo che sarraggio, 'na semmenta?
    n'albero? quacche frutto prelibbato?
    Va trova addò staraggio situato:
    si a ssulo a ssulo o pure 'mmiez''a ggente.
    Ma 'i nun 'e faccio 'sti raggiunamente:
    ì saccio che songh'io, ca sò campato,
    cu tutt' 'o buono e tutt' 'o mmalamente.
    E pè chello che songo sto appaciato:
    ca, doppo, pure si nun songo niente,
    saraggio sempe 'n 'ommo ca sò nato.
    Crea la tua Immagine
    Vota la poesia: Commenta
      Scritta da: Marilù Rossi
      in Poesie ()

      Amicizia

      Amicizia è n'acqua chiara,
      cristallina, trasparente,
      ca s'appanna dint'a niente
      e pirciò ch'e cosa rara.

      Cchiù 'amicizia è bella e cara,
      cchiù se sporca facilmente:
      'mmisturata 'a tanta gente
      ca te lassa 'a vocca amara.

      Chi 'a vò limpida 'e durata,
      nn' 'a sfruttasse pè prufitto,
      s' 'a tenesse, comm'è nata,

      dint' 'o core. E llà, 'amicizia,
      quanno 'o caluclo sta zitto,
      nun se sporca e nun s'avvizia.
      Crea la tua Immagine
      Vota la poesia: Commenta
        Scritta da: Marilù Rossi
        in Poesie ()

        'A Mamma

        'A Mamma è n'ata cosa: 'o cereviello,
        ll'asse d'a casa, 'o sciato, ll'armunia;
        è chella ca cumanna 'a cumpagnia:
        sta 'ncapa ò capo 'e casa, è nu cappiello.

        Attuorno tene sempe nu ruciello,
        abbada a mille cose, fa 'a Maria;
        e si nun sbatte pè na malatia,
        va ascianno sempe ll'ago cu 'o rucchiello.

        A chi nu punto, a chi na cera storta,
        a chi nu vaso, a chi n'avvertimento.
        E se capisce 'a mamma quanno è morta,

        quanno nun ce sta cchiù sta scucciantona:
        ca pare ca t'accide ogne mumento
        e, doppo nu minuto, te perdona.
        Crea la tua Immagine
        Vota la poesia: Commenta
          Scritta da: Marilù Rossi
          in Poesie ()

          Sant'Antonio

          Accussi chiacchiarianno
          nui ggiràvamo p' 'o cielo.
          -Tutto chesto ca te dico, sta sicuro,
          ch'è Vangelo!

          Viene 'a ccà, scinne sti ggrade,
          jammoncenne int' 'o ciardino;
          nce assettammo sott' 'o ffrisco...
          Vuo nu miezo litro 'e vino?

          Va dicenno, te piacesse
          cchiù na presa 'e marzaletta?
          Nfaccia a chesto, stammo bbuone!
          Ccà nc'è robba ca se ietta!

          Io, c'acalo sempe 'a capa
          nnanza 'a rrobba pè mangià,
          rispunnette: -' A marennella
          me garbizza, santo Pà!

          Bravo mo! Accussi te voglio!
          E, franchezza pè franchezza,
          si m'aspiette tre minute
          me farai na gentilezza;

          viene, assèttate nu poco,
          ch 'io mo torno, saglio e scengo;
          pè ttramente ca t''o ddico
          corro ncoppa, vaco e vengo!

          E me rummanette sulo
          miezo 'e ffresche, sot t' 'e mmura.
          Io, ntramente me guardavo
          'a bellezza d' 'a verdura,

          sento, arreto a cierti ffrasche
          poche passe nnanza a me,
          nu remmore. M'avutaie
          chiano chiano, pè vedè.

          Nu purciello chiatto chiatto,
          mbruscenannose, veneva,
          e cchiù appriesso nu Rumito
          s' 'o guardava e s' 'a redeva.

          Era 'o puorco 'e chillo Santo
          ca se chiamma Sant'Antonio,
          che facette magnà a mmorze
          'e ddenocchie d' 'o demmonio.

          Me susette, e c' 'o cappiello
          lle facette nu saluto.
          'O Rumito me guardaie;
          po' dicette: -' A dò sì asciuto?

          Comm' 'e fatto stu penziero?
          Figliu mio, va, tornatenne!
          Trova a n'angelo, e dincello
          ca te mpresta quatto penne...

          -Sant'Antò, ma ì sò venuto
          pè vedè no pè restà!
          Quanno moro, arrassusia,
          me vedite 'e riturnà...

          -E sperammo ca stu juorno
          fosse propeto luntano!
          Nui ccà ncoppa nce seccammo
          de restà cu 'e mmano mmano!

          Si sapisse, amico caro,
          comme stammo affiatate!
          Vai pè dì meza parola,
          e sò ciento scuppettate!

          È na vernia! Chillo ngrogna,
          chillo arraglia, chillo abbofia,
          chi buttizza, chi mmezzèa,
          chi te mbroglia e chi te scofia!

          Po'... Na mmidia, na schiattiglia,
          ch'è na cosa da crepà!
          Ccà sò tutte cape allerte!
          Vonno tutte cummannà!

          Santa Chiara mena zeppe
          contro Santa Catarina!
          Sant'Agnese furfecèa,
          Santa Rosa se stingina;

          Santu Onàzzio 'o giesuvito,
          nun t' 'o puozze mai sunnà!
          Nun par là de Santu Vito,
          pecché chillo... fa abballà!

          Cosicché... ccà è tale e quale
          comme abbascio?… - dicett'io.
          -Tiene sale int' 'a cucozza!
          Tiene e quale, figlio mio !

          Che te cride ca sultanto
          ncoppa 'a terra addò stai tu
          se cumbinano sti ccose?
          Uh Giesù, Giesù, Giesù!

          Tu mo sai ca tengo 'o puorco,
          se po' dì da che ssò nnato?
          embè, siente, si me cride:
          nun avevano tentato

          de luvarme l'animale?
          Neh, ched'è? Ca deva mpicce!
          S'avutaie Santo Nicola:
          -Va, facimmone sacicce!

          Llà fui tutto Santo Rocco,
          ca pecché nun tene 'o cane,
          va adderitto add' 'o Signore
          pè Ile fà tuccà cu 'e mmane .

          l'ingiustizia ca nce steva!
          Pecché 'o puorco e 'o cano no?
          Ma si 'o cane s'arraggiava?
          Aggio tuorto, neh, guaglio?

          Siente appriesso! ' A preferenza,
          tuttaquanta! (chesto è forte! )
          l 'ha da avè Santa Cicilia
          pecché sona ' o pianefforte !

          Te figure, int' 'a cuntrora,
          quanno 'e sante vicchiarielle
          se vurriano, a nomme 'e Dio,
          fà nu muorzo 'e sunnariello?

          Proprio tanno, chelIa pazza
          accummencia a zulfiggià
          cu 'a puntella 'e Traviata,
          cu 'o murzilio 'e Ruy-Blà!

          Pè ttramente po' te cride
          ch'ha fernuto, che robb'è?
          Bu-bu-bu!... tta-tta!... T'accide
          cu nu vàlzero ' e Sciopè !

          Tu vai ncopp'add' 'o Signore?
          Nce l'avise? E chelia peggio!...
          È figliola, àve raggione,
          tene 'o ggenio, 'o core lieggio,

          a la fine a chi fa male?
          Accussi se po' spassà...
          E va bbuone, votta lloco!
          Vò sunà? Falla sunà!

          Meno male, frate mio,
          ca fernesce 'o scassa-scassa
          pecché ncopp' 'o pianefforte
          mo ce metteno na tassa!

          Jammo appriesso: Sant'Ivone,
          prutettore d' 'e pagliette?
          Uh fratiello mio carnale,
          che mbruglione! Ma, a ppanette!

          Sempe mmiezo, affaccennato,
          se ntrumette e parla sempe!
          Pè te fà nu pasticciotto
          nun te lassa manco 'o tiempe

          ca tu dice: Avummaria!
          T'ha parlato? e t'ha mbrugliato!
          Uh, che naso muscariello!
          E se sape! È n'avvucato!

          Chesto è niente! San Clemente
          è geluso 'e San Pascale,
          Sant'Eliggio è nu canzirro,
          Sant'Emilio è n'animale...

          -Chiano chiano! dicett'io,
          vui che càncaro accucchiate !
          Site sante tuttequante,
          e sti fforme ve tirate?!

          -Chesti fforme? Peggio ancora!
          Ccà se tratta 'e menà 'e mmane!
          E si no, sciascione mio,
          è na vita manco 'e cane!

          A Madonna, sultant'Essa,
          va e se mette contra 'a legge!
          Essa sola è bona 'e core,
          te dà luce e te prutegge! !

          Tutt' 'e ggrazie ca lle cirche
          t' 'e fa tutte e 11'aute ancora!
          Essa sola è cumm' 'o sole,
          te rischiara e t'accalora!

          Dice buono 'o ditto 'e vascio,
          quando parla della donna!
          Una bona, nce ne steva,
          e 'a facetteno Madonna!

          L'auto riesto, caro mio,
          ne puo fà nu bello fascio!
          Quann'è doppo, o l'abbruciammo,
          o 'e mmenammo 'a copp'abbascio!...

          Si sapisse 'e fattarielle
          ca succedono! 'E ppalate !
          Comme va ca Santo Pietro
          nun ancora t'ha cuntate?

          -Chillo nun ha avuto tiempo,
          ma si torna, l'aggia dì
          ca dicesse quacche cosa.
          -Mo, si aspiette, accummenc'ì!
          Crea la tua Immagine
          Vota la poesia: Commenta
            Scritta da: Marilù Rossi
            in Poesie ()

            San Crispino

            San Crispino 'o ntussecuso
            tu già sai ca fa 'o scarparo!
            È nu piezzo 'artigliaria
            ca nun c'è chi le sta a paro!

            Ogne ghiuorno fa na storia
            mo pè chesto e mo pè chello,
            e, nfuscato, afferra 'a suglia,
            'o bisecolo, 'o martiello...

            Na matina, 'o Pat'Eterno
            le mannai, pè 'e ffà accuncià,
            na pareglia 'e meze-cape.
            Corre n'angiulo, e lle fa:

            - San Crispì, dice 'o Signore
            ca lle miette 'e mmeze-sòle !
            Vò na cosa acconcia acconcia...
            Ma che songo, sti pparole?

            Saie ca parle cu n'artista
            e nun già cu nu schiappino?
            Ma comm'è, te sì scurdato ,
            ca me chiammo San Crispino?

            Posa 'e scarpe e va vattenne,
            pecché, 'o riesto nce penz'io
            - No, serveva pè te dicere
            ca sti scarpe songo 'e Dio...

            -N'ata vota mo! Vattenne,
            ca t'avvio na forma appriesso!
            Siano 'e scarpe 'e chi se sia,
            ca pè me sò tutt''o stesso!

            Doppo n'ora l'angiulillo
            torna tutto appaurato.
            - Viene 'a ccà, pòrtale 'e scarpe!
            Tanto 'e pressa t'ha mannato?

            E dincelle: - Vò tre lire!
            Ve l 'ha fatto quase nove !
            Nce ha mettute 'e guardiuncielle,
            'e ppuntette, tacche e chiuove!

            L 'angiulillo, aizanno vuolo,
            va addu Dio. -Quante ne vò?
            - Vò tre lire... - Ma ch'è pazzo?
            - Che ne saccio, neh Signò?

            Chillo sta accussi arraggiato!
            N'ato ppoco me magnava! ...
            Si ll'avisseve sentuto
            comme ddiece jastemmava!

            - Lassa stà! Mo nce vach'io...
            E scennette. - San Crispi?
            - Gnò! - Ched'è sta jacuvella?
            Sti denare 'e vvuò accussì? ...

            - Accussì? Mannaggia 'a morte!
            Vì che capa gluriosa!...
            O pavate, o, n'ata vota,
            mo ve scoso tuttecosa!

            Tu capisce? lo nun t''o spieco!
            Cammurristo, chistu ccà!
            N''a fa bona manco a Dio!
            Miette a bbevere, paisà!
            Crea la tua Immagine
            Vota la poesia: Commenta
              Scritta da: Marilù Rossi
              in Poesie ()

              'O guardaporta

              Io trasette pe' na porta
              de cristallo affaccettato,
              e vutanno l'uocchie attuomo
              rummanette affatturato !

              Che lustrore! Che grannezze!
              Che culore! E quante cose!
              Ncoppa, sotto, a dritta, a manca,
              giglie d'oro e fronne 'e rose...

              Tuorno tuorno all'aria vanno
              'e cculonne argiento e oro.
              'E cristalle d''e ffeneste
              sò 'e brillante... Che tesoro!

              Ferdinà, nce sì ttrasuto?
              me dicette 'o Pat'Eterno -
              e sì 'o primmo da ch'è munnò
              'E pigliato chisto terno !

              Ecco l'atrio 'e tut t'e sante!
              Passa nnanza, cumpariè!
              Ma ched'è? Te sì ncantato?
              Viene sempre appriesse a me!

              'A vutata 'e na culonna
              veca a uno cu na chiave...
              È San Pietro? 'E nduvinato!
              'O talento 'o tiene! Brave!

              'O chiammai: - Piè, vide a chiste!
              - Pat'Etè, nun sò cecato...
              - Embè, puortalo giranno
              ca chist'è n'alletterato!

              Io sto stracquo e me ne vaco,
              pè me fà mez'ora 'e suonno!
              Nun fiscà cu 'o portavoce,
              pecché dormo e nun risponno !

              - Portavoce? Dicett'io;
              e 'o telefono, San Piè?
              - Nuie ccà stammo ancora arreto,
              figlio mio, che vuo sapè !

              Nuie mancammo 'e tanta cose!
              Nuie marciammo all'uso antico. ...
              Manco 'o gasso è mmiso ancora!
              Siente e vide che te dico!

              Ncunfidenza, si nun fosse
              pè sti qquatto stelletelle,
              uno ccà sarria suggetto
              d'appicciarse 'e llanternelle!

              Quanta vote aggio alluccato:
              "chisto è seculo ' e prugresso !
              Si facessemo quaccosa? "
              Nonzignore! Sempe 'o stesso!

              Sempe ll'angele cu 'e scelle,
              senza cuorpe. E senza niente!
              Sempe 'e nnùvole, e stu ncienzo
              ca nce dà chisti fumiente!

              Aggio fatto nu prugetto
              pè nu muorzo 'e gallaria...
              Nun ce songo riuscito...
              Stamme arreto, gioia mia!

              Vuie vevite acqua 'e Serino?
              Ll'acqua nosta è salimasta!
              Vuie tenite 'e trammuasse?
              Ccà nu scuorteco nce abbasta!

              Vuie tenite l'arduomôbbile,
              'a carorzza che va sola?
              E te cride ca 'o ppuô dicere?
              Seh, stai lustro! È na parola!

              Vuie tenite 'o velucicolo?
              Ccà vai pede-catapede !
              Nun sò ccose ca te scôcciano?
              Si se conta, nun se crede!

              Si tu pienze meza cosa,
              nonzignore, nonzignore!
              Ma sà quante sagliariano
              si mettesse l'ascensore?

              Embè niente! Nun è cosa!
              Chestu ccà nun 'o vvò fà!
              Si sì lieggio e mena viento,
              sulo tanno puô sperà!

              Penzai pure a nu triato
              pè nce fà cantà a Gajarre...
              Nun putette spuntà niente!
              Po' se dice c'uno sgarre!

              Songo stato amico Suio
              da guaglione, e che vò dì?
              Nun sò manco cavaliere!
              Vide mo c'aggia suffri!

              Ogne ghiuorno, core mio,
              po' aggia fà nu tiritosto,
              cu sta gente che m'arriva!
              Che te pare? È buono 'o posto?

              Purtinaro! 'E ditto niente!
              Tengo ancora 'o manto russo,
              chesta chiave dint''e scianche
              e sta barba sott''o musso!

              E na vrenzola 'e livrera?
              Chi t''o ddà! Faceva nguacchio,
              si me deva 'o pumo 'attone
              e 'o capiello c''o pennacchio!

              Che te pare? Aggio raggione?
              Siente appriesso: lucre, niente!
              Ccà nun pavano campagna,
              songo 'a scumma d''e pezziente!

              Nc'è San Giorgio, ch'è nu zero,
              e ogne sera mprufumato,
              allustrato e arricamato
              va facenno 'o nnammurato;

              embè cride ca turnanno
              mette mana à sacca e dà?
              Trase, ride, e po' me dice:
              - miette a ccunto, purtinà!

              Nce sta Santo Raffaele
              ca prutegge ' e ppiccerelle,
              e va sempre trafecanno
              cu na chiorma 'e sfacciatelle;

              embè, cride ca na vota
              te facesse na crianza?
              Bello mio, sò cacciuttielle,
              ca m'abbaiano 'int''a panza!

              È na vita ca, te dico,
              'o cchiù santo 'e tut t''e sante
              primma 'e farla pè mez'ora
              se mettesse a fà 'o brigante!

              Trase a chisto, caccia a chillo,
              mparulèate cu chill'ato,
              chiamma 'appello ogne matina...
              io, te ggiuro, sto malato!

              Quant'è cara 'a vista 'e il'uocchie,
              sto malato! È nu murl
              E pè ghionta, Isso s'addorme...
              e aggia fà tuttecos'ì !
              Crea la tua Immagine
              Vota la poesia: Commenta
                Scritta da: Marilù Rossi
                in Poesie ()

                'O Pallone

                Nce sò ghiuto int' 'o pallone
                e pircio ve saccio a dì
                tutto chello ca vedette,
                e v' 'o ppozzo fa capì.

                Me met tete int' 'a canesta
                miezo 'a folla ca guardava:
                quaccheduno cumpateva,
                quaccheduno cuffiava,

                e nce fui chiù de n'amico
                che dicette: -Ferdinà,
                sagliatenne allegramente,
                jammo! E nun t'appaurà!

                Io tenevo 'a faccia janca,
                v' 'o ccunfesso, sissignore;
                ma però ve l'aggia dicere
                ca nun era pè ttimore!

                Me credevo 'avè paura;
                ma, guardanno 'o capitane,
                alluccai: -Saglimmoncenne!
                Stammo 'a mo fino a dimane!

                Belli ccose! Nun v' 'e ddico,
                pecché nun se ponno dì!
                Pè n'avè n'infanzia bona
                jate, si nce vulit' 'ì!

                Basta, jette. A mille metre
                dint' 'e recchie me fiscava;
                ma che fa? Chillo spettaculo
                a pparola mia, ncantava!

                Cielo e nuvole. E da sotto
                'a città che scumpareva,
                e na tana de furmicole
                ogne cosa me parave.

                Ditto nfatto, 'o ppoco 'e luce
                se cagnai, po' scumparette.
                Era notte, e, abbascio, 'e strate
                me parevano merlette

                puntiate 'e ponte 'e fuco...
                Tutto Napule, allummato,
                deva idea de nu tappeto
                d'oro e argiento arricamato.

                Ncapo a nui redeva 'a luna,
                quacche stella zenniava;
                mmiezo a ll'aria doce e fina
                'o pallone sciasciava.

                -Addo jammo? Addo scennimmo?
                Capità? -Ma 'o capitane
                da sta recchia nun senteva!
                Cu nu litro 'e rumma mmane

                s' 'o veveva a surzo d'acqua;
                po' pigliai nu sacco 'arena,
                l'abbuccaie, 'o sbacantaie,
                e, cu 'a vocca ancora chiena

                de na coscia 'e pullo friddo,
                s'avutai vicino a me
                e dicette: -Andiamo in cielo!
                Visitiamo il Re dei Re!

                Nun fui cosa meza detta,
                ca, che ssà, chiudenno Il'uocchie,
                (nun redite, e nun dicite:
                Ferdinà, tu che mpapuocchie! )

                'o ccert'è ca me truvai
                mmiezo 'e nnuvole fermato...
                'O pallone, 'o capitane,
                ogne cose era sfumato.

                -Addò sto? Mannaggia 'o ciuccio!
                Addò vaco? Addò m'avoto?...
                Cammenammo?... E si sprufonno?
                Si me vene quacche mmoto?

                Faccio un'anema e curaggio
                e m'avvio chiano chianillo...
                Nnanz'a me passai, vulanno
                comm''a quaglia, n'angiulillo...

                -Va, nce simmo! io murmurai;
                già se vede quacche cosa.
                Voto Il 'uocchie e veco ' o cielo
                puntiato 'e fronne 'e rosa.

                Voto 'e spalle, e tutt'attuorno
                veco nuvole rusate;
                po' na specie 'e murmurio
                sento, e doppo, allummenate

                veco 'e mmure 'e Paraviso
                cchiù de Il'oro e cchiù d' 'o ffuoco...
                Me faccio anema e curaggio
                e m'accosto a poco a poco...

                Pè ttramente sbariavo
                nfaccia 'o mezzo pè ttrasì,
                sento a uno che me chiamma:
                -Che ffai lmloco? Tu chi si?

                Uh, sant'Anna, e che splennore!
                Era proprio 'o Pat'Eterno
                che dicette: -Torna 'nterra,
                ca si no.... vai all'Inferno!

                Nun fà troppo 'o capuzziello,
                pecché 'o ssà! Povero a tte!
                -Io nun faccio -rispunnette -
                niente 'e male, Pat'Etè !

                -E chi sì?... -Sò Tale 'e Tale...
                -E che fai? -Sò nu scrittore...
                -"Ferdinando arreto 'a Posta? "
                Te cunosco, sissignore!

                Sì nu bello mbriacone,
                si nun sbaglio, Ferdinà!
                Tu fai dint' 'a capa 'e morta
                e po' curre a ppredecà!

                -Pat'Etè, state in errore!
                Io nun songo già stu tale!
                Songo Ferdinando Russo,
                'o pueta dialettale...

                -Uh mannaggia 'o dialetto!
                Pure ccà me vuô zucà ?
                Comme fosse a Piedigrotta ?
                Che nce sì venuto a fà?

                Vuò parlà d' 'o Paraviso?...
                Va dicenno: che vuò dì?
                Io te saccio buono piro!
                'O rispette, plccerl...

                -Ma guardate... ma sentite...
                -russo rosso io rispunnette -
                Si nne parlo, se capisce
                ca nne parlo cu rispette.

                'O Signore me guardava!
                Po' dicette: -Sì ttenace!
                E cu st'anema 'e faccetta,
                plccerì, tu... me piace.

                Mpertinente cumm'a chisto
                mai nisciuno è capitato ! ...
                Io sò sempre 'o stesso viecchio,
                ma Ilà 'o munno s'è cagnato!

                E redeva sott' 'a barba
                chiano chiano, 'o vicchiariello;
                po' appujannose 'o bastone:
                -amme, miettete 'o cappiello!

                -me dicette -sì vvenuto?
                quacche cosa 'o bbuo vedè?
                E va bè, sarai servito!
                Viene sempre appriesso a me!
                Crea la tua Immagine
                Vota la poesia: Commenta
                  Scritta da: Marilù Rossi
                  in Poesie ()

                  E Fattarielle

                  S'assettaie vicino 'o puorco,
                  e già steve accummincianno,
                  quanno arriva 'o Guardaporta
                  cù 'a marenna int'a nu panno.

                  - Vino, pane, 'a fellatella...
                  Serve pè spuzzulià...
                  E vedenno à Sant'Antonio:
                  - Guè, Totò !... Tu pure ccà ?

                  - Stò cuntanno a stu signore
                  quacche fatto d' 'o paese...
                  Viene, assettete tu pure,
                  jammoncenne! A grand'imprese

                  E accussì, na vota ognuno,
                  sbacantanno 'e bicchierielle,
                  tra nu surzo e na resata
                  me cuntaino 'e fattarielle.
                  Crea la tua Immagine
                  Vota la poesia: Commenta
                    1 - 2 - 3 - 4 - 5 - 6 - 7 - 8 - 9 - 10  

                    PensieriParole Magazine